Eurohpá gielaid beaivi, čakčamánu 26. b. 2009
www.coe.int/EDL

‘Go hálat olbmuiguin sin gillii, don njeaiddát gielalaš ja kultuvrralaš eastagiid’, dajai Gabriella Battaini-Dragoni, Eurohpáráđi kultuvrraidgaskasaš gulahallama koordináhtor, go son lei čalmmustahttimin Eurohpá gielaid beaivvi (European Day of Languages - EDL). ‘Gielaid oahppan movttiidahttá min áicat sierra kultuvrraid ja sáhttá duođai veahkehit min bisánastit ja oažžut ođđa perspektiivva iežamet kultuvrii.’

Battaini-Dragoni muittuhii ahte gielaid oahppama mávssolašvuohta lea deattuhuvvon Eurohpáráđi áššedokumeanttas, mii gieđahallá kultuvrraidgaskasaš gulahallama: White Paper on Intercultural Dialogue ‘Living together as equals in dignity’. Dan mielde gielaid oahppan ovddida sáhkkiivuođa ja rabasvuođa earálágana hárrái, dat hehtte stereotypiijaid šaddamis, ja veahkeha min fuomášit mo earáiguin ovttas doaibman sáhttá riggudahttit min vásáhusaiguin. Kultuvrraid gaskasaš áddejupmi lea produktiiva gulahallama vuođđun.

Eurohpáráđđi julggaštii jagi 2001 Eurohpá gielaid beaivvi, goas ávvudit lingvistihkalaš ja kultuvrralaš girjáivuođa. Mii bovdet buohkaid searvat dán jagi doaluide, iskat giellamáhttuset ja návddašit gielain, mat geavahuvvojit sin birrasis. It ge don dárbbaš mátkkoštit olgoriikii: dálá máilmmiviidosaš servodagas don gávnnat eará gielaid ja kultuvrraid dalán nurkki duohken.

Eanet dieđuid doaluin gávnnat EDL neahttasiiddus:
 www.coe.int/EDL