Għaliex Jum Ewropew tal-Lingwi?

Qatt ma kien hemm daqstant opportunitajiet biex naħdmu jew nistudjaw f’pajjiż Ewropew ieħor, iżda n-nuqqas ta’ kompetenza lingwistika xxekkel lil bosta milli jieħdu vantaġġ minnhom.

Il-globalizzazzjoni u x-xejriet tas-sjieda tan-negozju jfissru li kulma jmur, iċ-ċittadini jkollhom bżonn ħiliet f’lingwi barranin biex ikunu jistgħu jaħdmu f’pajjiżhom stess. L-Ingliż biss m’għadux biżżejjed.

L-Ewropa hija għanja fil-lingwi — hemm aktar minn 200 lingwa Ewropea u hemm ħafna aktar lingwi oħrajn li jitkellmuhom iċ-ċittadini li għandhom il-familja li toriġina minn kontinenti oħrajn. Din hija riżorsa importanti li għandna nirrikonoxxuha, nużawha u ngħożżuha.

It-tagħlim tal-lingwi jgawdu minnu kemm iż-żgħażagħ kif ukoll l-anzjani – qatt m’inti anzjan wisq biex titgħallem lingwa u biex tgawdi l-opportunitajiet li din tiftaħlek il-bieb għalihom. Anke jekk taf biss ftit kliem tal-lingwa tal-pajjiż li tkun qed iżżur (pereżempju fuq btala), dan jippermettilek tagħmel ħbieb u kuntatti ġodda.

It-tagħlim tal-lingwi ta’ nies oħrajn huwa mod li jgħinna nifhmu lil xulxin aħjar u negħlbu d-differenzi kulturali ta’ bejnietna.

Objettivi

Il-ħiliet lingwistiċi huma neċessità u dritt ta’ KULĦADD — dan huwa wieħed mill-messaġġi ewlenin tal-Jum Ewropew tal-Lingwi.

L-għanijiet ġenerali huma li titqajjem kuxjenza dwar:

• Id-diversità lingwistika rikka tal-Ewropa, li għandha tiġi ppreservata u msaħħa;
• il-ħtieġa li tiġi diversifikata l-firxa ta’ lingwi li n-nies jitgħallmu (biex jinkludu lingwi li jintużaw inqas), li twassal għall-multilingwiżmu;
• il-ħtieġa li n-nies jiżviluppaw ċertu livell ta’ profiċjenza f’żewġ lingwi jew aktar biex ikunu jistgħu jaqdu r-rwol sħiħ tagħhom fiċ-ċittadinanza demokratika fl-Ewropa.